UNA VARIANTI NOBA
Cumedia scríta e dirigia de Gian Pàulu Vaccargiu
Binti de lampadas 2025
Rapresentatzioni de sa cumèdia in lingua sarda “Una Varianti Noba”
Ocannu puru is atoras e is atoris de su “Grupu teatru de sa LUTEC” (Libera Università Terza Età Carbonia) ant agatau sa manera giusta po fai passai un’ora e mesu de spàssiu e riflessioni a totus is spetatoris chi ant prenu su teatru centrali de Carbònia.
Su binti de lampadas ant rapresentau, difatis, po sa prima borta, sa cumèdia in lingua sarda “Una Varianti Noba” scritta e dirigia de Gian Pàulu Vaccargiu.
Onnia annu sa LUTEC serrat s’annu accadèmicu cun d’una rapresentatzioni teatrali noa, chi sa truma de is atoras e atoris preparant cun meda seriedadi e impìgniu.
Su spetàculu est stètiu presentau de su presidenti de sa LUTEC Giampaolo Sestu chi at sutalineau fintzas su trabalu spantosu chi is socius de sa LUTEC ant fatu po spostai sa sei de s’Universidadi in is localis nous de sa ruga Trento.
Est intervèniu apustis Gian Pàulu Vaccargiu chi at chistionau de sa cumèdia e at nau chi sa truma de teatru at bòfiu dedicai sa rapresentatzioni a Maria Laurino, morta de pagu a prus de cent’annus, mama de Alma, una atora de sa cumpangia e de Ines Pinna, po annus medas una grandu presidenti de sa LUTEC.
S’est fueddau de Covid in manera spassosa e po arriri, po ndi bogai de sa conca e de su coru is tempus arrorosus chi totus eus passau. Eus biu chi de is cosas lègias si podit fintzas arriri, difatis, ariseu est stetiu diareus unu bellu merì de spàssiu e su pùbblicu chi at prenu su teatru s’est spassiau meda e non at mancau de ddu marcai cun continuas tzacarradas de manus.
Sa cumpangia de teatru de sa LUTEC esistit de prus de binti annus, fintzas gràtzias a sòcius a cummenti a Gino Meloni chi, a s’edadi no prus giovunedda, recitat ancora cun passioni manna e impìgnu, donendi s’esperèntzia sua a totu sa truma.
Boleus torrai gràtzias a totus is atoras e is atores de sa LUTEC, is bècius e is nous, chi funt stètius totus preparaus e spassiosus meda e po s’impignu e sa passioni chi ant postu po si donai unu merì aici bellu e allirgu.
A ùrtimu boleus nomenai totu sa cumpangia:
Gian Paulu Vaccargiu Autori e regista
Mario Pintus Alfiu (Meri de domu)
Marinella Piras Serena Sa mulleri
Gino Meloni Tonino Amigu de Alfiu
Iole Giagoni Elsa Garau Bixina
Susanna Maccioni Silvia Amiga de Serena
Luciana Selis Doriana Sa sorri de Serena
Livia Crobu Dott.ssa Massa
Lilia Dettori Franca Sorri de Serena
Rosangela Manca infermiera Concas
Isa Piras Lina Garau Bixina
Artìculu de sa Provintzia de su Sulcis Iglesienti de su 30 mesi de Làmpadas 2025 de Giorgio Locci e Marta Tatti
